الجامعة (شو مشان)

[Dr.Ibrahim]

بسم الله الرحمن الرحيم
السلام عليكم ورحمة الله وبركاته
كل عام وانتم بالف خير
انا رح فوت بالموضوع دغري

اخواني انا صرت تانية بشري ولحتى الان وضع الجامعة موعاجبني

يعني لما شوف اصحابي بجامعة دمشق ما بعرف شو بيصير فيني

يعني بشوفن طلاب ايد وحدة

حتى معاملة الدكاترة معن غير مع انه الدكاترة نفسن عنا

بس مابعرف ليش بيعاملونا (انا اسف) باستهزاء بسخرية

وبنفس الوقت اغلب الطلاب محصلين على علامات عالية عنا

بس انا بدي منكن تنصحوني شو بعمل

كيف بدرس

وضع الجامعة شو

وخاصة من اخواني اللي في السنة الخامسة والرابعة

بتمنى تساعدوني وتعطوني شوية دافع للامام

وخاصة (الخامسة والرابعة) بداوموا بالمشافي

ارجوكم رجاء حار من اخ لكم ان تساعدوه

(انا اسف كتير يعني بالعربي انا مو شاطر كتير

مشان هيك يعني كاتب بالعامية وبالفصحى انا اسف)

وشكرا لكم
وكل عام وانتم بخير

[NMWH]

بسم الله الرحمن الرحيم

السلام عليكم ورحمة الله وبركاته
كل عام وانتم بالف خير


وعليكم السلام ورحمة الله وبركاته..
وأنتم بألف خير..


انا رح فوت بالموضوع دغري


واضح ^_^


اخواني انا صرت تانية بشري


ما شاء الله انشاالله العمر كله


ولحتى الان وضع الجامعة موعاجبني


ليش مين عاجبه وضع الجامعة..؟!
أصلاً وضع الجامعة مين بده يعجب ليعجب؟ "إرضاء الناس غاية لا تدركP:"
قصدي أي ناحية منهم مو عاجبتك "شكله أكتر من ناحية^__^"


يعني بشوفن طلاب ايد وحدة


هالشغلة الجامعة مالها يد فيها ؛الحمدلله؛

ومتعلقة بعدة عوامل
مثلاً
عدد الطلاب يعني مثلاً بالعادة 50% من الطلاب متعاونين 20%أنانيين 10%منعزلين أو نفسياتهن صعبة....20%فاصلين..... طبعاً وهالنسب متفاوتة بس بتبقى بإطار الطبيعي بس المشكلة بتكون لما العدد الأساسي قليل مثلا بدفعتنا 120 طالب "نظرياً" بقدر قول وبتفاؤل انو 50طالب متعاونين ولكن مع اختلاف أشكال التعاون ومع تفرقنا الشديد وتوزيعنا إلى فئات عديدة بالنظري وبالعملي عم يتبعدو هالـ50 وعم تبقى النسبة ضمن الـ20 تبع فئة العملي..أما هونيك النظري الكل بيحضروه سوا "مع ندرة الحضور في صفوفهم" وبالعملي ما شاء الله يمكن أكتر من 50 بالفئة والله يخليلهم حكيم (http://www.hakeem-sy.com) ويخليهم اله وظروف كتير تانية لازمها تخيل منيح للوضع ودراسة ابعاده الثقافية والاجتماعيةوالاقتصاديةووووو "ولعية^_^"

حتى معاملة الدكاترة معن غير مع انه الدكاترة نفسن عنا
بس مابعرف ليش بيعاملونا (انا اسف) باستهزاء بسخرية


مع انه ما بعتقد انو هالشي بالمطلق بس لما بيكون موجود....
بكل بساطة لسببين:

1-لأنو مو حدا بهالبلد بيقدر ينسى شو يعني تقسيم البشر حسب علامة البكالوريا وما حدا بيقدر يتخيل الفرق حتى لو كان علامة وحدة انو مو موجود
فهالعلامة يلي فقدناها بطريقة أو بأخرى هنن جابوها "كمان بطريقة أو بأخرى" وانتهى الموضوع وكل واحد قبع بالرف يلي حددله ياه مجتمع البكالوريا..7_7..
2- لأنو هالفكرة المسبقة تبع الطبقات عم يجو طلاب جامعتنا الوقورين ويكرسولهم ياها بكل بساطة "دكتور احذفلنا من يلي داخلين .. دكتور صعبين الأسئلة.. دكتور ما عم نلحق معك.. .. .." ما بنكر انو في شي من هالأمور بجامعة دمشق بس بحدوده
يعني متل طلاب البكالوريا العلمي والأدبي الكل عندهم شهادة ومنهاج وووو بس العلمي مسدقين حالهم وعارفين من نعومة اظفارهم انو البكالوريا بدها هز كتاف اما الأدبي بيستغربوا من الأساتذة اذا ارهقوهم بشي واجب او شي من هاد وبيعتقدو انو لازم يعيشو حياتهم طبيعي وهاد يلي بيصير...
المهم القصة الاستعداد النفسي وردة الفعل وكمان زيادة عتبة التحمل والتطلع نحو الأفضل وكسر حاجز التنبلة ....


وبنفس الوقت اغلب الطلاب محصلين على علامات عالية عنا


والله بين كلمة أغلب ومعظم والعديد من وووو ضاعت الطاسة
وما حدا مجبور يخبرك علامة البكالوريا تبعه...
الخلاصة الناس بتعرف انو يلي جايب 168 بيقدر يفوت طب "ومع وجود فيتامين و بأكدلك انو حتى أقل ممكن"
طبعاً ما بنكر انو الكسالى عم يتساقطو بتقادم السنين "باستثناء المتعلقين بفيتامين و"
وما بنكر انو في نسبة منيحة علامات عالية "طبعا اكتر شي رايحة علينا نحنا جماعة المنح:mad:!"
بس النسبة لا أنا ولا انت منقدر نحددها
والحكم عن المجموع يصدر وفق الأغلبية وأن تكون هذه الأغلبية تعبر عن آرائها..

بس انا بدي منكن تنصحوني شو بعمل
كيف بدرس
وضع الجامعة شو
وخاصة من اخواني اللي في السنة الخامسة والرابعة
بتمنى تساعدوني وتعطوني شوية دافع للامام
وخاصة (الخامسة والرابعة) بداوموا بالمشافي
ارجوكم رجاء حار من اخ لكم ان تساعدوه


ان شاء الله منساعد "في الحلقات القادمة وذلك لضيق الوقت وطول المشاركة"
ملاحظة: أسئلتك تحتاج لإجابات موسعة وقسم كبير منها ممكن يكون آراء شخصية
فديرو بالكن انتو السنافرالصغار مو كل ما تسمعو حدا رابعة او خامسة حكى تفكرو صح100%


(انا اسف كتير يعني بالعربي انا مو شاطر كتير
مشان هيك يعني كاتب بالعامية وبالفصحى انا اسف)

وأنا كمان آآآآآآآآآآآآآآآآآآآآآآآآآآآآآآسفة كتيييييييييييييييير عالعامية وعالإطاااااااااااااااااالة


.....................يتبع

[Dr.Ibrahim]

بسم الله الرحمن الرحيم

بشكر الدكتورة NMWH (http://www.mda-sy.com/vb/member.php?u=24) على ردها

وبتمنى بتعطينا رأيها وتجربتها وتنصحنا كمان


اوه سؤال :

انا حاليا مابتذكر من السنة الاولى شي (الا التشريح+الانسجةوشوية جنين)

لا فيزياء ولا كيمياء ولاوراثة ولا خلية ولا

فهل هذا طبيعي
اوووووووووـــــــــــــو


وشكرأ

اسف على الإطالة

[NMWH]

السلام عليكم و رحمة الله و بركاته...

و بعد البسملة و الحمد و الثناء، و الصلاة على خاتم الرسل و إمام الأنبياء،
فإني أبتدئ القول ببيان فضل ما نقوم به من دراسة، في علم الطب والفراسة،
فإنا إن شاء الله إن قمنا بهذا مرضاة لوجهه وإعلاءً لدينه ومنفعةً لخلقه
نلنا شرف الجهاد والعبادة، وتزودنا بالأجر الذي ينفعنا في دار السعادة
بإذن الله....


أما عن الرأي في أساليب التعلم، وأسباب التأقلم، فإني سأحاول الاجتهاد ما استطعت،
فإني إن أصبت أُجرت، وإن زللت عُذرت....
وأستهل بقول صاحبنا أبي فراس الحمداني:


تهون علينا في المعالي نفوسنا * ومن يخطب الحسناء لم يغله المهر


وإن هذا لعمري قولٌ سديد، ولكن يحتاج لتصرفٍ حسب معطيات عصرنا الجديد......


تهون علينا في المعالي فلوسنا * ومن يطلب الطب لم يغله السهرُ


فيا إخواني من مرتادي هذه الجامعة الخاصة وما شاكلها ولف لفها وخاصة المسجلين
في كلية الطب -المنعوتة بالمستوى الرفيع والتي حلم بها كل منكم منذ أن كان رضيع-
اعلموا أنكم تخوضون تجربةً لا يحسدكم عليها حاسد، بل ويشفق عليكم منها كل لبيب ناقد..
فهي دراسة إن لم أقل صعبة فإنها ليست بالسهلة وفوق هذا يأتيك على رأس كل فصلٍ
موسم دفع الخراج، لإمامٍ أمره أمرّ من الحَجّاج "وهذه خصلة ارتاح منها مرتادوا جامعة
الحكومة المصونة"
كما أنها حديثة مستظرفة فلا تجد الكثير ممن إليها قد سبقك وبتجربته قد نفعك ولا تجد
من الناس استساغة أو قبولاً بل تجد استهزاءً ونفوراً
فجامعتنا بنظرهم ليست إلا منتجعاً يأوي إليه الكسالى المترفون،
وبشهادةٍ شكليةٍ ينعمون.............................


أما أبناء جامعة العاصمة العتيدة فهم الأبطال الأشاوس الذين حققوا الآمال ببذل النفائس فهم


بعيدون عن الكسل والنواقص فإذا ما ابتدأ الواحد منهم مشواره في الكلية استقبلته فرقةٌ خاصةٌ


من الطلاب أولي الألباب ترشدهم إلى السبيل وتهون عليهم المستحيل تشرح لهم التقاليد السائدة


الخالدة في كليتهم عبر العصور فإن استجد فيها أمر جاء بخبره على الفور موقعهم الفذ الذي


يحتاج لصفحات وصفحات



وإني وبعد أن عزمت كتابة مقالة طويلة في هذا عدلت رأفة بعيون من سيقرأولأن مستحب


الكلام هو المختصر المفيدومختصر القول يا سادة أننا في هذه الجامعة الحديثة العهد تواجهنا


مشاكل على أصعد عدة:


-الصعوبات التي تواجهنا "مع أنفسنا" في الدراسة والمتابعة وتحمل المعلومات


-الصعوبات التي تواجهنا مع جامعتنا من ناحية أداء واجباتها وما إلى هنالك


-الصعوبات التي تواجهنا مع المجتمع الذي يصعب عليه تقبلنا كثيرا.........


-الصعوبات التي تواجهنا على صعيد الاعتراف بنا في البلدان والوزارات...


-الصعوبات المادية التي نلقيها على عاتق أهلنا المحبين



وإني فيما بعد سأفصل لكم الوسائل لتجاوز هذه الصعوبات بأقل الخسائر ففيها الإجابة عن كل


المسائل بإذن الله وتوفيقه


إلا أن قرطاسي خذلني الآن فجف حبره فاستمهلوني ريثما آتيكم بقرطاس وقلم جديدين من عند


وراقنا المشهور أبي غصام النشتري


فإلى حينها أستودعكم الله والسلام......

[hbwn99]

ما شاء الله نقلة نوعية من العامي للفصيح:d

بس لحد الآن لسا ما حدا جاوب على الأسئلة الجوهرية

عنجد نقاش مهم

يا ريت لو نسمع أكتر من رأي

[LOLA]

هلأ بجامعة دمشق المحبة و مساعدة الطلاب لبعضن و الدكاترة الظراف :confused:
والله على علمي صارلي 4 سنين بهالكلية العظيمة و ما بتذكر اني شفت هيك شي و اذا بدي اسأل طالب أو دكتور مشان اي خدمة او سؤال لازم فكر سنة قبل :mad:لانو النتيجة معروفة سلفا الرفض بطريقة هزلية
........................................
والله يا ندوش شو هالابداعات الادبية ;)

[NMWH]

هلأ بجامعة دمشق المحبة و مساعدة الطلاب لبعضن و الدكاترة الظراف
والله على علمي صارلي 4 سنين بهالكلية العظيمة و ما بتذكر اني شفت هيك شي و اذا بدي اسأل طالب أو دكتور مشان اي خدمة او سؤال لازم فكر سنة قبل لانو النتيجة معروفة سلفا الرفض بطريقة هزلية





مثلاً
عدد الطلاب يعني مثلاً بالعادة 50% من الطلاب متعاونين 20%أنانيين 10%منعزلين أو نفسياتهن صعبة....20%فاصلين..... طبعاً وهالنسب متفاوتة بس بتبقى بإطار الطبيعي بس المشكلة بتكون لما العدد الأساسي قليل مثلا بدفعتنا 120 طالب "نظرياً" بقدر قول وبتفاؤل انو 50طالب متعاونين ولكن مع اختلاف أشكال التعاون ومع تفرقنا الشديد وتوزيعنا إلى فئات عديدة بالنظري وبالعملي عم يتبعدو هالـ50 وعم تبقى النسبة ضمن الـ20 تبع فئة العملي..أما هونيك النظري الكل بيحضروه سوا "مع ندرة الحضور في صفوفهم" وبالعملي ما شاء الله يمكن أكتر من 50 بالفئة والله يخليلهم حكيم (http://www.hakeem-sy.com/) ويخليهم اله وظروف كتير تانية لازمها تخيل منيح للوضع ودراسة ابعاده الثقافية والاجتماعيةوالاقتصاديةووووو "ولعية^_^"



يعني هالكلام غلط؟؟
http://www.shbab3moga.com/vb/images/icons/33.gif

وكمان لاحظي

مع انه ما بعتقد انو هالشي بالمطلق بس لما بيكون موجود....



بعدين اذا حضر الماء بطل التيمم الميكرفون معك
أما نحناhttp://www.shbab3moga.com/vb/images/icons/26.gif


والله يا ندوش شو هالابداعات الادبية

http://beautyrose84.jeeran.com/95734563.gif

[د.طارق]

كلام حلو
بس منشان ابراهيم تأكد انو التدريس بجامعتنا احسن ب100 مرة من جامعة دمشق
بس سمعة جامعة دمشق بطلابها (اكترهم اكتر من 236 )بالباكالوريا
الحل لازم تروح الواسطات من الجامعة وتكون الاسئلة اصعب
فالطلاب التعبانة بتهرهر ويصير مستوى الجامعة احسن
شكرا

[د.طارق]

ابراهيم:232
nmwh:234

[Dr.Ibrahim]

اهلا وسهلا بالدكتور طارق


وحياالله وهلا والله ولعيونك يا طارق


انا بعرف انو التدريس عنا احسن ب321 مرة من دمشق


بس انا كنت بدي اخذلي كم نصيحة من اخواني في السنوات المتقدمة

بس لحتى الان

لا حياة لمن تنادي

[Dr.Ibrahim]

بس طبعا بشكر nmwh

وبقول لطارق بلا فضايح شو 232
234

لاتصدقوه

ماشي

سلام

[د.طارق]

ولا يهمك برو لك انت لحالك بتكفي وبتوفي
شو 232 عل الفاضي
ملاحظة: مامطول لتطلع الاولي

[Dr:MahmouD]

السلام عليكم
يا اخواني انتو عم تقارنوا بجامعة دمشق كأنو نحنا كنا مخيرين بينها وبين جامعتنا ........
أما الواقع انو نحنا مسيرين وما إلنا إلا نرضى بقسمة ربنا ونحاول نرقى بمستوانا العلمي الى حد نرغم فيه المجتمع على انو يقبلنا
لا تنسو انو طلاب جامعة دمشق بيعتمدوا على البصم بشكل اساسي بينما نحنا دراستنا بالانكلش غير انها حسنت لغتنا الاجنبية بشكل كبيييير بتجبرنا انا نفهم بعدين نحفظ وحتى لو اكتفينا بالفهم فهو الاساس
صفيت شغلة الاعتراف: انا كتييير بسمع انو القلمون معترف فيها اكتر من جامعتنا مع انو الدكاترة عنا اقوى بكتييير(عراقيين ومختصين برا) ونحنا لازم نستنى اول دفعة تخرج(أكباش الفداء) ونشوف إذا رح يقدروا ينتزعوا الاعتراف و بقوة انشالله لانو انا ما بتخيل انو الطالب الكسلان قد ما كان عندو فتامينات ووووو مارح يقدر يوصل للتخرج وحتى لو فيتاميناتو قدرو يخرجو لسا في قدامو فحص وطني وكمان الحياة العملية رح ترفضو
بس عنجد في طلاب (وطالبات ظبعا) مستعدين نتحدا فيهن طلاب دمشق (البصم) وغيرها

اسف للاطالة و للعامية .....
والسلام عليكم ورحمة الله وبركاته

[NMWH]

السلام عليكم
وعليكم السلام
يا اخواني انتو عم تقارنوا بجامعة دمشق كأنو نحنا كنا مخيرين بينها وبين جامعتنا ........
هيك ضربت عالوتر الحساس بالنسبة الي لاني على طول بقارن لعدة اسباب منها اني كنت مخيرة في هذا..... للآن مع اني اؤمن بقضاء الله خيره وشره ومع اني دخلت الجامعة وانتهى وفي معظم الاحيان بدافع عنها ولكن للآن خايفة وبرجع لنقطة الصفر .. شو جابني من جامعة دمشق لهون واحيانا بحس انو مو مشكلة وشي ظريف واحيانا واحيانا.........
وكمان شو ذنب الطلاب بشكل عام يلي قصروا على علامات معدودة..... شو بكالوريا ولا اختبار ذكاء...."يعني قصدي مقارنتنا بين ناس متل بعض مو نخب اول ونخب عاشر"
أما الواقع انو نحنا مسيرين وما إلنا إلا نرضى بقسمة ربنا ونحاول نرقى بمستوانا العلمي الى حد نرغم فيه المجتمع على انو يقبلنا
هي اهم نقطة كنت ناوية احكي فيها بعد ما جبت قرطاس وقلم من عند الوراق ابو غصام النشتري....
نقطة هامة جدا وجوهرية لازم كل الطلاب يحطوها بين عيونهن ويتوكلو على الله ويدرسو
لا تنسو انو طلاب جامعة دمشق بيعتمدوا على البصم بشكل اساسي بينما نحنا دراستنا بالانكلش غير انها حسنت لغتنا الاجنبية بشكل كبيييير بتجبرنا انا نفهم بعدين نحفظ وحتى لو اكتفينا بالفهم فهو الاساس
هيك نزعتاااااااااااااااااااااااااااااااا
هل رحت لعند طلاب جامعة دمشق واحد واحد وشفت كيف بيدرسو؟؟؟؟
وشو ما كان الموضوع او الرأي المطروح دائما الواحد مو لازم يحط رأي مطلق
"وبحذر الجميع انو يبدوا اي رأي مطلق من هالنوع بهالموقع ولح كون بالمرصاد "
مين قلك انو طلاب دمشق ما بيدرسوا انكليزي بالعكس بيزيدو عنا انو بيدرسو بالعربي اما الانكليزي ما شاء الله عنهم بيقرؤو مراجع وبيعرفوا المصطلحات وكل شي بس طبعا العربي اقربلهم لانو بيتداولوه مثلا نحنا منعرف ان الرئة هي lung بس لما منحكي عن المحاضرات وال..... منقول lung ......وهنن العكس
يلي ما بيعرف طلاب جامعة دمشق يروح ويشوف موقع حكيم بقسمه العلمي آلاف الطلاب بيشاركوا بأمور طبية فكل يوم عشرات الحالات السريرية والدرر الطبية والصور والفلاشات والنقاشات الغنية جدا واغلب هالامور بالانكليزي وبكتير من الاحيان بيكتبوا الشغلة هيك وهيك...............
صفيت شغلة الاعتراف: انا كتييير بسمع انو القلمون معترف فيها اكتر من جامعتنا
داخل سورية لا يوجد فرق ولا واحد بالمليون بالنسبة للاعتراف الرسمي "مو الاجتماعي"
أما خارج سوريا فكل جامعة هي وشطارتها تعمل اتفاقيات مع جامعات عربية وعالمية مع ان وزارة التعليم بتقول انها بتخبر كافة الجهات الخارجية انه هدول جماعة الخاصة معترفين فيهم وتحت جناحنا وهيك قصص
"بس اذا بدنا نفكر منطقيا مثلا اذا جامعة اجنبية بدها بالزور تقبل حدا عربي ومن سوريا وعندهم خريجي دمشق وخاصة فممكن تطلع براسهن ويعملوا افضلية...."
مع انو الدكاترة عنا اقوى بكتييير(عراقيين ومختصين برا)
رجعنا للأحكام المطلقة..... مين احسن من مين؟؟ انت وانا منعرف كل دكاترتنا وكل دكاترتهم ...؟؟ أكيد لأ
إذا الصمت افضل من الحكي...
ونحنا لازم نستنى اول دفعة تخرج(أكباش الفداء)
للأسف!
انا ما بتخيل انو الطالب الكسلان قد ما كان عندو فتامينات ووووو مارح يقدر يوصل للتخرج وحتى لو فيتاميناتو قدرو يخرجو لسا في قدامو فحص وطني وكمان الحياة العملية رح ترفضو
بس عنجد في طلاب (وطالبات ظبعا) مستعدين نتحدا فيهن طلاب دمشق (البصم) وغيرها
نحنا ما عم نحكي غير هيك .... بس اذا قلنا انو طلابنا كلهم نخبة ومغربلين بيجي حدا مثلا من جامعة دمشق بيقول بس ابن خالتي وابن جيراننا بالخاصة كسلانين واغبياء وووووو وسألتهم كم سؤال "طبعا نكشو من تحت اظافره" وما عرفوا الجواب عليه......
ولذلك تحاشيا للأحكام المطلقة نذكر الجانب المظلم اما الجانب المضيء فيظهر لوحده .....لا تعذب حالك وتتحدا حدا....

وما رح اعتذر عن الإطالة لأنو ما فيني اختصر والكلام يلي كتبته ضروري لوضع النقاط على الحروف.......

[Dr:MahmouD]

مع انه كان ردا شديد اللهجة و لكنه كان موضوعيا وبناء بما يكفي لأن يقبل بكل روح رياضية


رحم الله امرا" أهدى إلينا عيوبنا

[mohanad]

السلام عليكم و رحمة الله
اول مشاركة بحب اشارك فيها
انه الحمدلله انه في جامعات خاصة بسوريا
خلتنا ندرس هون جنب اهالينا احسن ما نطلع و نسافر لبرة
لأنه أنا فرقت معي 5 ساعات وكنت مسجل بجامعة بمصر ومسافر لهنيك
هاد اول سبب انه الحمدلله بجامعتنا
تاني سبب ويلي هو الأهم بإعتقادي
انه دراستنا باللغة الإنجليزية
و كل كتبنا و معلوماتنا
حديثة و جديدة 100
و كتير رح تساعدنا
بنكمل بعدين
سلام

[mohamad450]

ان شاء الله الجامعة الخاصة نفس العامة واكتر منها
هذا بيصير بجدنا و باجتهادنا

[Dr.Tariq]

السلام عليكم

أنا ضد أنو نقارن حالنا بجامعة دمشق
لأنو هنن مو أحسن ناس وجدوا على البسيطة
يعني بأصد أنو ما بيصير أنو يكون حلمنا أنو نكون متل طلاب جامعة دمشق و هيك منكون نحنا حققنا إنجاز
يعني مثلاً ليش ما يكون مثلاً حلمنا أنو نكون متل طلاب جامعة هارفارد أو أكسفورد مثلاً
بعرف بعرف انو رح تقولو أنو هاد الزلمة أجدب و عم يحلم و بعرف أنو هاد الشي صعب كتير
بس معليش، ما في شي مستحيل على قدرة الإنسان و طاقاته
يعني هدنك بشر و نحنا بشر
بس يلي بيفرقهون عننا أنو كل واحد منهم في عنده هدف براسه عميسعى أله بالليل و النهار
و نحنا فعلاً مو شاطرين إللا بالتذمر و بترجي الدكاترة أنو تصغر المنهاج يلي هو بالأصل مصغرينو منشان يتلائم مع قدراتنا المتواضعة
و يلي بدي أوصللو أنو وضع الجامعة سيئ لأنو طلابها بدون هيك و بدون دائماً الأسئلة سهلة و المنهاج صغير فكيف وضع الجامعة بدو يتحسن ؟؟؟؟؟؟؟؟؟؟؟؟؟؟؟؟؟؟؟؟
و من النهاية أنا برأيي أنو كل واحد لازم يبلش من نفسه و يحسن بدراسته ، طبعاً الشغلة حتطول لتبين النتيجة بس صدأوني أنو حنلاقي نتيجة ، و أنا اعتباراً من هاد الفصل فعلاً قررت أنو تكون دراستي مختلفة عن الخمس الفصول السابقة.
بعرف إنني نظظرت كتيييييييير بحكيي بس فكروا فيها شوي بس شوي حيطلع معكم نفس الحكي

سلااااااااااااااااااااام

[أميرة النجوم]

بقدر علق بما اني اندعيت حيث اني من السنوات المتقدمة على ما يبدو:أول شي انت بتشوف حالك دائما بعيون الآخرين لهيك بنصحك اتكل على الله أول شي بعدين ضاعف ثقتك بنفسك ومتل مالك رح تظهر للآخرين فأنت فعلا رح تكون هيك-طلاب جامعة دمشق مو أحسن منا بشي غير انون مدعوكين بالحياة -لسا الطريق طويل قدامك ولسا رح تصير أحسن منون بس تفاءل!!!ولحتى أثبت انو حكيي صح -داومت بالاسعاف مع طلاب جامعة دمشق البشري وبعد شهر لحتى عرفوا اني أسنان بعد ما اعترفت بالموضوع -ومو بس هيك علمتون كيف يخيطوا أطراف مع اني ماداومت غير شهر وما بعرف شي عن تشريح الأطراف بس ما حدا حس بهدا الشي ؟؟ بعدا من دون ما فكر صار عندي فضول لأعرف أكتر عن التشريح وتأكد انو المعلومات تراكمية يعني كل أخدتوا لسا بينعاد مرات ومرات -بس خلي ثقتك بنفسك عالية ودائما اسأل وما حدا خلق متعلم -الناس ياللي بيشوفوك صغير هلأ رح يجي يوم يشوفوك في أعلى منون -متل ساعتين الأولى كانت سابقة التانية وماوقفت بس التانية أسرعت شوي آم سبقت الأولى-وبعد مناقشات مع طلاب جامعة دمشق شفت انو في كتيييييييييير طلاب واسطات وياما طلاب بيحملوا مواد!!!!!!! بس كمان لاتنسى فكرة التثقيف الذاتي حتى اذا معلومة باليوم واترسخت فكتير منيح ولا تنسى هددددددددددفك ارضاء الله أول شي-ودائما هناك طريقة أسهل لتعلم أي شي فسال كتييييير -يمكن كترت غلبة وحكيت كتير بس ان شاالله كون فدت بشي -وأعضضضضضضضضضضاء مدى مابينخاف عليون-شكرا

[أميرة النجوم]

وانسيت شي كتير مهم وهو اني بأول سنة كنت محبطة بشكل لأني كنت عم شوف الكل عم يفهم عدا أنا عم اسأل اسئلة غبية!!!!!وكنت شوف كل ياللي حوليي عم يعرفوا يشتغلوا كل شي وأنا عم يزبط شي معي آم بعد ما تعرفت أكتر على رفقاتي طلعوا عاملين حالون عميفهموا وطلعوا أدي بيفرحوا وقت حدا متلي بيتجرأ وبيسأل!!!!!!!!!!! موبس هيك طلعوا بيدربوا مية مرة بالبيت عالشغلة حتى تصير معون وأنا آل كنت محبطة لي ما عم تزبط معي من أول مرة!!!!!!!!ويا الله شو ضحكت عحالي بعد ما شبعت بكي بأول سنة!!! فتفكر يرعاك الله

[hamoody]

يعني وبصراحة جزاكم الله ألف خير وحكيكم كتييييير حلو وبيرفع من ثقة الواحد من نفسو انا صرت سنة تانية ( يعني متلك يا حلو ) وبشعر متلي متل أي شخص بهالجامعة انو بس احكي لشخص اني بجامعة خاصة بحس انو بينظروا إلي اني داخل بفلوسي عالجامعة وما بستهال وانو الدراسة عنا بالجامعة نجاح للكل وعالماشي.
وبالنسبة للدراسة انا كمان مو ذاكر شي الا التشريح وشوي جنين لاني لما كنت عم ادرسهم كنت حاسهن انهن بيفيدو بالطب أكتر وكنت مركز فيهن اما الباقي تعب بال عالفاضي.
بس والله اول فصل كان تعب والله انو بالانجليزي وجو جديد وهيك شي
بالنسبة للسنة التانية خايف منها والله وكتييير في ناس بيخوفوني منها والله يستر.

[zezoo_5]

شو هالكلام الحلووووووو حمودي
مشكووووور ابراهيم ع الواقع يلي عم تحكي مزبوط هاد شي الكل منعاني منو بس بدياك تعرف شي اهم شي انتا رح تطلع من الجامعة لغتك انجليزي ازا قعدت بين ناس اجانب بتفهم شو عم يحكو ما بدك حدا يساعدك وبعدين انا بالعكس بشوف الدكاترة مافي منن كلن مناح ومافي استهزاء انت بتقدر تحط حد لاي حدا انو يستهزا فيك او لاء لهيك بقلك جامعتنا حلوة وبعدين السنة الاولى دايما بتكون جس نبض ازا مشي حالك كرجت وازا بنشرت الله يعينك وياخي تفائلو بالخير تجدووووه ولو احنا اطباء لازم يكون عندك صبر

مع تحيااااتzezoo_5